Bækur, t.d. námsbækur geta gefið gott yfirlit yfir viðfangsefni. Þær innihalda venjulega heimildalista sem nýta má til að skoða viðfangsefnið í víðara samhengi. Margar bækur á rafrænu formi eru í boði fyrir nemendur og starfsfólk Háskóla Íslands.
Tímarit innihalda oft nýjar upplýsingar um tiltekin viðfangsefni. Tímaritshefti eru gefin út reglulega - vikulega, mánaðarlega eða árlega, og þar birtast nýjar upplýsingar því fyrr en í bókum þar sem útgáfuferlið er yfirleitt lengra.
Tímaritsgreinar eru skrifaðar af sérfræðingum á einstökum fræðasviðum. Áður en grein er gefin út í vísindatímariti er hún ritrýnd ("peer reviewed"), þ.e. aðrir sérfræðingar meta greinina og mikilvægi hennar fyrir fræðasviðið. Tímaritsgreinum fylgir heimildaskrá sem oft má nota til að rannsaka viðfangsefnið betur. Flest tímarit safnsins eru á rafrænu formi. Það þýðir m.a. að þau eru aðgengileg hvar og hvenær sem er og ný hefti útgefenda eru oft aðgengileg um leið og þau koma út. Rétt er þó að vekja athygli á að í nokkrum gagnasöfnum getur verið birtingartöf (e. embargo) á einstökum titlum, þ.e. einhver tími líður frá útgáfu þar til heftið birtist. Þetta á m.a. við um vinsæl söfn á borð við ProQuest og JSTOR.
Vefsíður. Það er auðvelt að leita að og finna ýmsar upplýsingar á Internetinu. Vegna mikils magns upplýsinga þar getur þó verið erfitt að finna þær upplýsingar sem vantar og enn erfiðara að skilja kjarnann frá hisminu. Þegar leitað er að fræðilegu efni er best að nota Google Scholar.
Allir geta birt upplýsingar á Internetinu og því er sérstaklega mikilvægt að sýna aðgætni og leggja mat á áreiðanleika þeirra upplýsinga sem ætlunin er að nota.
leitir.is er skrá yfir allt efni í eigu íslenskra bókasafna. Best er að nota lbs.leitir.is til að finna og staðsetja bækur, rafbækur og aðrar upplýsingar sem eru í eign eða áskrift bókasafnsins. Veljið lbs.leitir.is og eins er gott að kynna sér leiðarvísinn leitir.is en þar er að finna leiðbeiningar um leit í skránni.
Kynnið ykkur gagnasöfnin sem safnið veitir aðgang að. Þau eru af ýmsum toga og eru þau stærstu þverfagleg, þ.e. vísa bæði í almennt og fræðiegt efni á ýmsum sviðum. Í slíkum gagnasöfnum er hægt að velja um að leita eingöngu í ritrýndu efni (peer reviewed) eða fræðiritum (scholarly).
Önnur gagnasöfn eru með efni á afmörkuðu fræðasviði.
Myndband frá Kennslunefnd Félagsvísindasviðs Háskóla Íslands.